Со цел да се воспостави културна соработка помеѓу децата од Македонија и Хрватска, со размена на гостувања како во Скопје, така и во Загреб, нивно зближување и развој на детската свест за помагање на други на кои помошта им е неопходна, Општина Центар во соработка со детскиот хор „Пахуљице„ и Македонско-хрватското здружение за промовирање на културните вредности и врски „Spectrum“ од Загреб го организира реализирањето на меѓународниот проект „ДЕЦА  ЗА ДЕЦАТА И НАСМЕВКА НА НИВНИТЕ ЛИЦА“.

Во реализацијата е вкучена и Заедницата на хрватското малцинство во РМ од Скопје.

По тој повод во Универзалната сала во Скопје на ден 29 мај 2010 година во 19:30 часот ќе се одржи целовечерен концерт на детските хорови „Пахуљице“ од Загреб и „Златно славејче“ од Скопје (кој годинава одбележува 40 годишен јубилеј). Концертот е хуманитарен, а средствата од влезниците ќе бидат наменети за детскиот оддел при Клиниката за онкологија во Скопје.

Се заблагодаруваме на покровителот Град Скопје, Општина Центар како и на сите оните кои на било кој начин го подржаа овој хуманитарен проект и помогнаа да се донесе насмевка на детските лица.

(Љ.Винокиќ, 06.05.2010)